ఇంగ్లీష్‌ రాని అమ్మాయి… కలెక్టర్‌ అయ్యింది!

స్ఫూర్తి దాయక ఐఏఎస్‌ అధికారి – సురభీ గౌతమ్‌ కథ

మధ్యప్రదేశ్ నవంబర్ 19 అనంత జనశక్తి న్యూస్

మధ్యప్రదేశ్‌లోని ఓ దూరమైన కుగ్రామం… కనీసం వైద్యం, విద్యుత్ కూడా సరిగా లేని పరిస్థితులు. అలాంటి గ్రామంలో పుట్టిన సురభీ గౌతమ్‌ చిన్నప్పుడే తన లక్ష్యాన్ని నిర్ణయించుకుంది—ఐఏఎస్‌ ఆఫీసర్‌ కావాలి!ఆరో తరగతి లెక్కల పరీక్షలో వందకు వంద మార్కులు సాధించిన రోజే తన శ్రమకు విలువ దక్కుతుందని గ్రహించిన సురభీ, పదో తరగతిలో లెక్కలు–సైన్స్‌లో శతకోత్సవాలు సాధించి రాష్ట్ర స్థాయిలో గుర్తింపు తెచ్చుకుంది. ఆ విజయమే ఆమెలను సివిల్‌ సర్వీసెస్‌ దిశగా నడిపించింది.

గ్రామం మార్చాలనే తపన

తన గ్రామంలో ఉన్న మౌలిక సదుపాయాల లేమి సురభీకి బాధ కలిగించింది. “ఒకరోజు ఈ గ్రామాల కోసం పని చేసే అధికారి అవ్వాలి” అన్న సంకల్పంతో ఇంజినీరింగ్‌ చదువుకు భూపాల్‌ వెళ్ళింది.

గ్రామం నుండి పై చదువుకు వెళ్లిన తొలి అమ్మాయి సురభీ. ఇది ఆమెకు గర్వమూ, బాధ్యతయూ.

ఇంగ్లీష్‌ తెలియదనే అవమానం… కన్నీళ్ల వెనుక ధైర్యం

హిందీ మీడియం బ్యాక్‌గ్రౌండ్‌… కాలేజీలో అందరూ ఇంగ్లీష్‌ మాట్లాడుతుండటం సురభీని కలచివేసింది. మొదటి క్లాస్‌లోనే మాట్లాడలేక అవమానం. వెనక్కు వెళ్లిపోవాలనిపించినా… తల్లి మాట ఆమెను నిలబెట్టింది:

“సవాళ్లు వచ్చినప్పుడు పారిపోవద్దు… అదే సమయం ఎదగడానికి!”

అది సురభీకి మలుపు. రోజుకు గంటలు గంటలు శ్రమించి ఇంగ్లీష్‌ నేర్చుకుని, చివరకు యూనివర్సిటీలోనే టాపర్‌ అయింది.

అసలు లక్ష్యం పిలుపు

సివిల్స్‌ వయసు రాక ముందే ఇతర పోటీ పరీక్షల్లో ఎంపికైనా… మనసులో మాత్రం అసంతృప్తి. “నీ అసలు లక్ష్యం మర్చిపోవద్దు” అన్న తల్లి మాటతో మళ్లీ సివిల్‌ సర్వీసెస్‌పై దృష్టి పెట్టింది.

రైల్వే ఉద్యోగం చేస్తూనే ప్రతి నిమిషాన్ని ఉపయోగించుకుని సిద్ధం అయింది. ఒక్కో పేపర్‌కు నాలుగు గంటలు కేటాయిస్తూ… క్రమశిక్షణతో ముందుకు సాగింది.

అమ్మే స్ఫూర్తి

తన తల్లి చిన్న వయసులోనే ముగ్గురు పిల్లలతో పోరాడిన తీరే సురభీకి బలం.

“అమ్మను చూస్తే నాకు కలిగిన కష్టాలు ఏమీలేవనిపించింది. నేను కాస్త కష్టపడితే నా కల నెరవేరుతుందని తెలుసుకున్నాను.”

సివిల్స్‌లో సత్తా—ఆల్‌ ఇండియా 50వ ర్యాంక్‌

తన కఠోర శ్రమ ఫలించి UPSCలో AIR 50 సాధించింది. గుజరాత్‌లో మొదటి పోస్టింగ్‌. “సేవ చేసినప్పుడే పదవికి గౌరవం ఉంటుంది” అనే నమ్మకంతో పని ప్రారంభించింది.

ప్రస్తుతం వడోదర అసిస్టెంట్‌ కలెక్టర్‌

రాజకీయ ఒత్తిళ్లు, వినూత్న సవాళ్లు—అన్నింటినీ ఎదుర్కొంటూ ప్రజల అవసరాలకు ప్రాధాన్యం ఇస్తున్న సురభీ, తన కృషితో తక్కువ కాలంలోనే ప్రజల గౌరవాన్ని అందుకుంది.

స్ఫూర్తిగా నిలిచిన సురభీ

ఇంగ్లీష్‌ తెలియక అవమానం ఎదురైనా… గ్రామం నుంచి బయట అడుగుపెట్టిన తొలి అమ్మాయి అయినా… ఎన్నో అడ్డంకులను బద్దలు కొట్టి తన కల సాకారం చేసుకున్న సురభీ గౌతమ్‌.నేటి యువతకు, ముఖ్యంగా గ్రామీణ ప్రాంతాల అమ్మాయిలకు ఆమె ప్రయాణం ఓ స్ఫూర్తి దీపం."పరిస్థితులు కాదు… మన నిర్ణయం, మన శ్రమనే మన భవిష్యత్తు నిర్ణయిస్తాయి" అని నిరూపించిన ఐఏఎస్‌ అధికారి సురభీ గౌతమ్‌.