వైద్య వృత్తిని సేవాభావంతో నిర్వహించాలి: మంత్రి కందుల దుర్గేష్

నిడదవోలు పీహెచ్‌సీ సందర్శన – జనరల్ బాడీ మీటింగ్‌లో పాల్గొన్న మంత్రి దుర్గేష్

రోగులతో ముఖాముఖి – ఆసుపత్రి సౌకర్యాలు, మందుల నిల్వలపై ఆరా

ఆరోగ్యాంధ్రప్రదేశ్ లక్ష్యంగా వైద్యులు సమర్థవంతంగా పనిచేయాలని పిలుపు

నిడదవోలు మార్చి 14, అనంత జనశక్తి న్యూస్

వైద్య వృత్తి కేవలం ఒక ఉద్యోగం మాత్రమే కాదని, అది మానవతావాదంతో కూడిన పవిత్రమైన సేవ అని రాష్ట్ర పర్యాటక, సాంస్కృతిక మరియు సినిమాటోగ్రఫీ శాఖ మంత్రి కందుల దుర్గేష్ పేర్కొన్నారు. శనివారం నిడదవోలు ప్రాథమిక ఆరోగ్య కేంద్రాన్ని సందర్శించిన మంత్రి దుర్గేష్ అక్కడ నిర్వహించిన సాధారణ సర్వసభ్య సమావేశంలో పాల్గొని వైద్యులు, సిబ్బందితో చర్చించారు. ఆసుపత్రి అంతా కలియతిరిగిన మంత్రి దుర్గేష్ వార్డుల్లో చికిత్స పొందుతున్న రోగులతో ఆప్యాయంగా మాట్లాడి వారి ఆరోగ్య స్థితిగతులను తెలుసుకున్నారు.ఆసుపత్రిలో అందుతున్న వైద్య సేవలు, సిబ్బంది పనితీరుపై రోగుల నుండి నేరుగా సలహాలు, సూచనలు స్వీకరించారు. అనంతరం మందుల స్టాక్ రిజిస్టర్‌ను పరిశీలించి, మందుల నిల్వ కేంద్రాన్ని తనిఖీ చేశారు. రోగులకు అవసరమైన మందులు ఎల్లప్పుడూ అందుబాటులో ఉండాలని అధికారులను ఆదేశించారు.ఈ సందర్భంగా ఏర్పాటు చేసిన సమావేశంలో మంత్రి దుర్గేష్ మాట్లాడుతూ పలు కీలక సూచనలు చేశారు.వైద్యులు విధి నిర్వహణలో మానవతా దృక్పథాన్ని చాటుకోవాలని, రోగులకు భరోసా కల్పిస్తూ చికిత్స అందించాలని కోరారు. వ్యాధులు ప్రబలకుండా ప్రజల్లో ముందస్తు జాగ్రత్తలపై అవగాహన కల్పించడంలో పీహెచ్‌సీ వైద్యుల పాత్ర అత్యంత కీలకమని స్పష్టం చేశారు.పీహెచ్‌సీల్లో అపరిష్కృతంగా ఉన్న సమస్యలను తన దృష్టికి తీసుకురావాలని, వాటి పరిష్కారానికి ప్రభుత్వం తరపున పూర్తి కృషి చేస్తానని హామీ ఇచ్చారు. కూటమి ప్రభుత్వం ప్రజారోగ్యానికి పెద్దపీట వేస్తోందని, 'ఆరోగ్యాంధ్రప్రదేశ్' నిర్మాణంలో ప్రతి వైద్యుడు భాగస్వామి కావాలని పిలుపునిచ్చారు.చివరగా, ఆసుపత్రిలో చికిత్స పొందుతున్న రోగులకు ధైర్యం చెప్పిన మంత్రి దుర్గేష్ మెరుగైన వైద్యం అందించడంలో ఎటువంటి నిర్లక్ష్యం వహించవద్దని వైద్యులను ఆదేశించారు.ఈ కార్యక్రమంలో స్థానిక ప్రజా ప్రతినిధులు, వైద్య ఆరోగ్య శాఖ అధికారులు మరియు సిబ్బంది పాల్గొన్నారు.