కేసులు తగ్గించండి, రికవరీలు పెంచండి – జిల్లా ఎస్పీ

పోలీసులు ప్రజల విశ్వాసం పొందాలి ఎస్పీ జగదీష్

నేర నియంత్రణకు కఠిన చర్యలు అవసరం – ఎస్పీ పిలుపు

సమర్థవంతమైన దర్యాప్తే ప్రజా న్యాయం – ఎస్పీ పి. జగదీష్

పెండింగ్ కేసులు పరిష్కారమే ప్రధాన లక్ష్యం – ఎస్పీ ఆదేశాలు

అనంతపురం క్రైం నవంబర్ 11, అనంత జనశక్తి న్యూస్

జిల్లాలో పరిశోధనలో ఉన్న కేసులను తగ్గించాలనీ... అమలు కార్యక్రమాలను కొనసాగిస్తూ రికవరీలను పెంచాలని జిల్లా ఎస్పీ పి. జగదీష్ ఆదేశించారు.మంగళవారం స్థానిక పోలీసు సమావేశ మందిరంలో జిల్లా పోలీసు అధికారులతో నెలవారీ నేర సమీక్షా సమావేశం నిర్వహించిన ఎస్పీ, జిల్లాలో పెండింగ్‌లో ఉన్న తీవ్రమైన మరియు సాధారణ కేసులు, హత్యలు, చిన్నారులపై లైంగిక నేరాలు, దొంగతనాలు, ఆస్తి కేసులు, వాహన దొంగతనాలు, మిస్సింగ్ కేసులు, మోసపూరిత కేసులు, రోడ్డు ప్రమాదాలు, మరియు ఇతర నేరాలపై సర్కిల్ వారీగా సమీక్ష చేశారు.దర్యాప్తు వేగవంతం చేయడం, కేసుల పరిష్కారానికి అవసరమైన చర్యలు తీసుకోవడం, నేర నియంత్రణకు పటిష్ట చర్యలు చేపట్టాలని సూచించారు.జిల్లా వ్యాప్తంగా అమలు కార్యక్రమాలను కొనసాగించాలని, దొంగతనాల కేసుల్లో రికవరీ శాతం పెంచాలని ఆదేశించారు. ప్రతి పోలీసు స్టేషన్‌ పరిశోధనలో ఉన్న కేసులను తగ్గించి, పెండింగ్‌ కేసులను త్వరగా పరిష్కరించాలని చెప్పారు. దర్యాప్తు పూర్తయిన కేసుల్లో చార్జిషీట్లు ఆలస్యం లేకుండా దాఖలు చేసి కోర్టు విచారణ ప్రారంభం అయ్యేలా చూడాలని సూచించారు.చిన్నారులపై లైంగిక నేరాలు, అత్యాచార కేసుల్లో దర్యాప్తు వేగాన్ని పెంచాలని, హత్యలు మరియు ఇతర ప్రధాన కేసుల్లో శాస్త్రీయ విధానాలను అనుసరించి సమగ్ర దర్యాప్తు జరపాలని చెప్పారు. మహిళలు, చిన్నారుల అదృశ్యం కేసుల్లో అలసత్వం లేకుండా వెంటనే చర్యలు చేపట్టాలని ఆదేశించారు.అనుసూచిత కులాలపై కేసులను త్వరగా పూర్తి చేసి కోర్టులో చార్జిషీట్లు సమయానికి దాఖలు చేయాలని, బాధితులకు న్యాయం జరిగేలా చూడాలని తెలిపారు.రాత్రిపూట గస్తీ పెంచి, నేరప్రవణత గల ప్రాంతాల్లో నిఘా పెంచి దొంగతనాలు అరికట్టాలని సూచించారు. పాత నేరస్థులు, రౌడీషీటర్లపై పర్యవేక్షణ కొనసాగించాలని అన్నారు.రోడ్డు ప్రమాదాల నివారణకు ప్రమాదాల వివరాలను విశ్లేషించి, ప్రమాదాలు ఎక్కువగా జరిగే ప్రాంతాల్లో ప్రత్యేక చర్యలు చేపట్టాలని, ప్రజలు రహదారి భద్రత నియమాలు పాటించేలా కృషి చేయాలని చెప్పారు. మైనర్ డ్రైవింగ్‌ చేసే వారి తల్లిదండ్రులకు కౌన్సిలింగ్‌ ఇవ్వాలని సూచించారు.మాదకద్రవ్యాల దుష్ప్రభావాలు, చట్టపరమైన చర్యలపై ప్రజల్లో అవగాహన కల్పించాలని, సైబర్‌ భద్రతపై విద్యార్థులకు, ప్రజలకు చైతన్యం తీసుకురావాలని సూచించారు.ప్రజల్లో సీసీ కెమెరాల ప్రాముఖ్యతపై అవగాహన కల్పించి వాటిని ఏర్పాటు చేసుకునేలా ప్రోత్సహించాలని చెప్పారు.పేకాట, మట్కా, కోడిపందేలు వంటి చట్టవ్యతిరేక కార్యకలాపాలను కట్టడి చేయాలని సూచించారు.ప్రజలతో మమేకమై, స్నేహపూర్వకంగా వ్యవహరిస్తేనే పోలీసుల పట్ల విశ్వాసం పెరుగుతుందని, ప్రతి పోలీసు అధికారి గ్రామాల సందర్శనలు తప్పనిసరిగా చేయాలని సూచించారు.వృత్తి నైపుణ్యాన్ని పెంచుకుంటూ సిబ్బందితో సమన్వయంగా పనిచేయాలని, ఆధునిక సాంకేతికతను వినియోగించి ప్రజలకు మెరుగైన సేవలు అందించాలని సూచించారు.కేసుల ఛేదనలో, దర్యాప్తు నాణ్యతలో, పెండింగ్‌ కేసుల పరిష్కారంలో ప్రతిభ కనబరిచిన పోలీసు అధికారులు, సిబ్బందిని ఎస్పీ ప్రశంసించి అభినందించారు.ఈ సమావేశంలో తాడిపత్రి అదనపు ఎస్పీ రోహిత్‌కుమార్, డిఎస్పీలు శ్రీనివాసరావు, రవిబాబు, శ్రీనివాస్, వెంకటేశులు, మహబూబ్‌బాషా, సీఐలు, ఎస్సైలు తదితరులు పాల్గొన్నారు.